‘‘එඩින්බරෝ සරසවියෙන් දුන් ආදී මානවයින්ගේ අස්ථි තැන්පත් කරන්න ආරක්ෂිත තැනක් ඕන‘‘

එඩින්බරෝ විශ්ව විද්‍යාලය විසින් සිදුකරන ලද පරීක්ෂණ වලින් පසු වසර 300 ක් පමණ පැරණි ආදිවාසි මානවයන්ගේ හිස්කබල් හතක් සහ ශරීර දෙකකට අයත් අස්ථි කොටස් ආරක්ෂාකාරීව තැන්පත් කිරීම සඳහා දඹාන ආදිවාසී කෞතුකාගාරය නවීකරණය කළයුතු බව ආදි වාසි නායක ඌරුවරිගේ වන්නිල ඇත්තෝ පැවසීය.

මේ පිළිබඳව ජනාධිපතිවරයා සහ අගමැතිවරයා මුණ ගැසී සාකච්ඡා කිරීමට ද බලාපොරොත්තුවන බව ආදි වාසි නායකයා සඳහන් කළේය.

මෙම හිස්කබල හා අස්ථි කොටස් මහජන ප්‍රදර්ශනයට තැබීමට අවශ්‍ය ආරක්ෂිත ස්ථානයක් ‍සහ ආදිවාසි කෞතුකාගරය වැඩිදියුණු කිරීමේ වගකීම රජයට ඇතැයිද ආදිවාසි නායකයා එහිදී වැඩිදුරටත් අවධාරණය කළේය.

එහිදී වැඩිදුරටත් අදහස් දැක්වූ ආදිවාසී නායකයා මෙසේද පැවසීය.

     ‘‘යටත් විජිත සමයේ මල්ලක දාගෙන ගගෙන් එගොඩ වෙලා මේවා ගෙනිච්චාද දන්නේ නැහැ. නමුත් ආපසු අපිට භාර දෙනකොට ඩෙන්මාර්ක් රටට මාව ගෙන්වලා ඉතා ගෞරවාන්විතව භාරදුන්නා.

ඒ නිසා මේ වගේ වටිනා සංස්කෘතික උරුමයක් මල්ලක දාලා දුම්මැස්සක තියන්න බැහැ.

තවත් හිස්කබල් සහ අස්ථි කොටස් 14000 ක් ඇති බවත් ඒ වාද ඉදිරියේ දී භාරදීමට කටයුතු කරන බවත් ඔවුන් පැවසුවා.

ජාත්‍යන්තර  පරීක්ෂකයන්ට දැන් අපේ රටට ඇවිත් වසර සිය ගණනක් පැරණි ආදිවාසින් පිළිබඳව පරීක්ෂණ කරන්න පුළුවන්.

අපේ විද්‍යාඥයන්ටත් ස්කොට්ලන්තයේ එඩින්බරෝ විශ්ව විද්‍යාලයට නොගොස් දඹානට ඇවිත් මේ පරීක්ෂණ  කරන්න පුළුවන්‘‘ යැයිද ආදිවාසි නායකයා පැවසීය