සිංහ රෙජිමෙන්තුවට ජනාධිපති යෂ්ටිය පිරිනමයි

ශ්‍රී ලංකා සිංහ රෙජිමේන්තුව මවුබිමට කළ මෙහෙය අගයනු වස් ජනාධිපති යෂ්ටිය සහ රෙජිමේන්තු යෂ්ටිය ප්‍රදානය කිරීම ඊයේ (30දා) පස්වරුවේ අඹේපුස්ස සිංහ රෙජිමේන්තු කඳවුරු භූමියේ දී පැවැත්විණි.

මෙහිදී අදහස් දැක්වූ ජනාධිපතිවරයා ප්‍රකාශ කළේ සිංහ රෙජිමේන්තුව ශ්‍රී ලංකාව වෙනුවෙන් සිය සේවය ඉටු කළ බවයි. යුද්ධය හේතුවෙන් සිංහ රෙජිමේන්තුවේ පමණක් 3700කගේ පමණ පිරිසකගේ දිවි අහිමිව තිබෙන බවද ජනාධිපතිවරයා මෙහිදී ප්‍රකාශ කළේය.

මෙහිදි ශ්‍රී ලංකා සිංහ රෙජිමේන්තුවේ සෙබළ දෑත් වලින් නිමවු ජාත්‍යන්තර ප්‍රමිතියෙන් යුත් පුස්තකාලය විවෘත කිරීම මෙන්ම කිනදෙනිය මහා විද්‍යාලයේ 05 වසර ශිෂත්ව විභාගය සමත් සිසුන් වෙත ත්‍යාග ප්‍රදානය කිරීම ද ජනාධිපතිවරයා අතින් සිදු විය.

අමාත්‍ය ෆීල්ඩ් මාර්ෂල් සරත් ෆොන්සේකා, ආරක්ෂක රාජ්‍ය අමාත්‍ය රුවන් විජේවර්ධන, ආරක්ෂක අමාත්‍යාංශයේ ලේකම් කරුණාසේන හෙට්ටිආරච්චි යන මහත්වරුන් ඇතුළු ආරක්ෂක අංශ ජ්‍යෙෂ්ඨ නිලධාරින් රැසක් එක්වූහ.

නිරෝෂා ප්‍රියදර්ශනී