උපන්දිනයට මහජනතාවට විවෘත වන පේරේ සරසවිය

පේරාදෙණිය විශ්ව විද්‍යාලයට වසර 80 ක් සපිරීම නිමිත්තෙන් ජූලි මස 01 වැනි දින පෙරවරු 10.00 සිට මහජනතාවට විවෘත දිනයක් ලෙස එහි පාලන අධිකාරිය ප්‍රකාශයට පත් කොට තිබේ .

මෙම දිනයේ දී විශ්ව විද්‍යාලය වටා ඇති මාර්ගෝපදේශනය සහිත චාරිකාවකට එක්වෙමින් විශ්වවිද්‍යාලයේ සියලු පීඨයන් නැරඹීමේ අවස්ථාව මහජනතාවට හිමිවේ .

මෙරට පමණක් නොව දකුණු ආසියාවටම වැදගත් පුස්තකාලයක් වශයෙන් සැලකෙන පේරාදෙණිය විශ්වවිද්‍යාලයේ පුස්තකාලය නැරඹීමට මෙන්ම නර්තන ගායනා හා සංස්කෘතික අංගයන්ගෙන් සමන්විත විශේෂ කලා සන්දර්ශන නැරඹීමේ අවස්ථාව ද එහිදී ජනතාවට හිමි වෙයි .

විද්‍යාර්ථීන්ගේ සමිති හා සමාජයන් පිළිබඳ දැනුවත් කිරීම සඳහා වූ ප්‍රදර්ශන කුටි විශාල ප්‍රමාණයක් ද උත්සව භූමිය තුළදී දැක බලා ගැනීමේ අවස්ථාව හිමි වන අතර උසස් අධ්‍යාපනය හදාරන පාසල් සිසුන්ගේ ගැටලු හා විමසීම් වලට පිළිතුරු ලබාදීමට ද එහි සෑම ස්ථානයකම රැඳී සිටින විද්‍යාර්ථීන් සූදානමින් සිටී .