ධර්මාශෝකයේ දිනුක ක්‍රිකට් වාර්තාවක් තබයි

ශ්‍රී ලංකා ක්‍රිකට් කණ්ඩායමේ නායකයෙකු ලෙස කටයුතු කරන උපුල් තරංග මහතා පාසල් ක්‍රිකට් ක්‍රීඩකයෙකුව සිටි කාලයේ අම්බලන්ගොඩ ධර්මාශෝක විද්‍යාලයෙන් තබා තිබූ වාර්තාවක් එම විද්‍යාලයේ දිනුක දිල්ෂානි විසින් වසර 14 කට පසුව බිඳදමන ලදී.
2003 වසරේ දී ගාල්ල රිච්මන්ඩ් විද්‍යාලය සහ අම්බලන්ගොඩ ධර්මාශෝක විද්‍යාලය අතර පැවැති වයස 19 න් පහළ අන්තර් පාසල් තරගයේ දී උපුල් තරංග පළමු ඉනිමේ දී ලකුණු 212 ක් ලබා ගත්තේය. එය ධම්සෝ ක්‍රීඩකයකු එක් ඉනිමක දී ලබාගත් ඉහළම ලකුණු සංඛ්‍යාව ලෙස වාර්තා පොත් අතරට එක්විය.
මේ වසරේ මාතර ශාන්ත තෝමස් විද්‍යාලය හා ධර්මාශෝක විද්‍යාලය අතර පැවැති වයස 19 න් පහළ අන්තර් පාසල් ක්‍රිකට් තරගයේ දී ධර්මාශෝක විද්‍යාලයේ දිනුක දිල්ෂාන් පළමු ඉනිමේ දී ලකුණු 216 ක් ලබා ගනිමින් උපුල් තරංග මීට වසර 14 කට පෙර තබා තිබූ වාර්තාව බිඳ දැම්මේය.
මේ වාර්තාව බිඳ දැමීමට දිනුකට පන්දු 218 ක් වැය කිරීමට සිදුවූ අතර හයේ පහර 9 ක් සහ හතරේ පහර 18 ක් එයට අන්තර්ගතවී තිබුණි. ක්‍රීකට් ක්‍රීඩාවෙන් මෙලෙස දස්කම් දක්වන දිනුකගේ පුහුණුකරැ ලෙස ඉසුරැ අනුෂ්ක මහතා කටයුතු කරයි.
(කරන්දෙනිය - එම්. සුසිල් ප්‍රියන්ත)